شظايا حادّة

أنت من أقحمت نفسك في ذلك ..
فأهلاً بك في عالم اللارحمة ..

/

هنا ستجد طقوس خاصّة بالحرف الصّامت ..
وبهمسة أحذرك فللحروف شظايا حادّة ..

إنتي وأخوكِ / إنت وإختك !.





..

إنتي وأخوكِ /  إنت وإختك !.

بسم الله الرحمن الرحيم
السلام عليكم ورحمة الله وبركاته

كيف توثقين علاقتك بأخوك ؟!.


[ السالفه وما فيها ]
إن وحده من صديقاتي دايم تشكي من أخوها، وآخر مره قبل أمس، المهم شفت إن البنات إلي تدعي عليه وإلي تقول سوي له كذا وسوي فيه كذا ، وما بقى إلا يعلمونها كيف تسوي له سحر !.

المهم أنا أعطيتها شوية نصايح عالطاير بس هي أبداً ما تبي تطبّق ولا شي، بعدين شفت إن السالفه جازتلي والنصايح حلوه وفكّرت عاد إني أكتبها كموضوع عشان الكل يستفيد .

أذكر يومها أرسلت لكم سؤال عن هالموضوع   /   ( كيف علاقتكِ مع أخوك / كيف علاقتك مع إختك ) ؟


[ نقاط لازم نتفق عليها ]
× بأبعد عن العربية الفصحى عشان توصل الفكره سريع =)
× ما يمنع إن الشباب يشوفون هالموضوع ويعكسون الكلام من مؤنث إلى مذكر ويطبقونه مع أخواتهم =)
× العناد / هذا خلّيه على جنب شويه .
× شيلي من راسك فكرة إن بُعدك عن أخوك هو الحل عشان تفتكين من تسلّطه وطلباته، لأن الحل الوحيد هو التقرّب منه .


[ تـنـبـيه ]
معروف إن الرجل له كبريائه وغروره خاصّه عندنا يالعرب والخليج بالذات، بس مو معنى كذا إن إنتي ما عندك كبرياء !.

بالعكس عندك لكن من المعروف برضوه إن الإناث ألين من الرجال ومرنين في تعاملهم أكثر، عشان كذا أنا اخترت إنك إنتي إلي تتقربي منه مو تنتظرينه هو يجي عندك !.

يعني خلّي غرورك وفكري كيف تكسبينه في صفّك .


[ الهدف من الموضوع ]
سد الفجوة أو الثغرة إلي بين الأخت وأخوها واستبدالها بعلاقة مخاواهـ ،
يعني إن شاء الله بعد ما تنتهي من قراءة هالموضوع وبعد شهر من تطبيقه تكونين كسبتي أخوك كـخوي لك مو بس صديق .


[ الـنّـتـائـج ]
× أخوك راح يصير خويك بإذن الله .
× طلباتك راح تصير أوامر بإذن الله .
× بتلاقين أحد يعطيك وجه بعد ما كان 24 ساعه مع أخوياه .
× بتحسين براحه نفسيه فضيعه واسأل مجرب .
× وأهم شي راح يمتلئ الفراغ العاطفي عندك وعند أخوك وساعتها لا انتي بحاجة إنك تكلمين وإلا تخاوين ولا هو .



[ مقدّمه بسيطه ]
× لكِ خيتو ..
طالعي حولك، شوفي عندك بالمدرسه وإلا الجامعه، شوفي كم وحده تطلع مع شباب أو حتى تكلمهم !!
شوفي كم وحده طايحه إعجاب × إعجاب !!
شوفي كم وحده لو شفتيها بالشّارع بدون عبايه ما شكّيتي إنها بنت !!
/
× لك أخي الشّاب ..
شوف عندك من أخوياك وإلا من أقاربك وإلا حتى أصحابك بالعمل ..
كم واحد مخاوي ؟!.
كم واحد إيميله كلّه بنات، شريحته كلها بنات !!.

///

× (( هذا كلّه بسبب التفكك إلي صاير، كله من الفراغ العاطفي إلي نحس فيه ..
يعني شي طبيعي وفطري ميول الشاب للفتاه، والفتاه للشاب، بس إذا امتلأ الفراغ العاطفي إنحلّت المشكله ))



[ أشياء تحتها خطّين ]
<<  مهمّه وجايّه بالإمتحان =)
× إذا كان الولد الوحيد فـضروري جداً إنك تطبقين هالكلام / وأيضاً إذا كانت البنت الوحيده .
( بسبب الشعور بالوحده وإن كان ما يبيّن هالشي )
× حسسيه بأهميته، وبحاجتك له، لأن الرجال عامةً يحبون هالشي يعني يحب إنه يكون الكل بالكل .
× احترميه ولا تحقرين منه أبداً .
× عوديه بس يسويلك شغله حتى لو بسيطه عالكلام الحلو لأن هالشي بيشجعه، يعني مثلاً: الله لا يحرمني منك، لا عدمناك، ما تقصر، ومن هالكلام  =)
×  لا تنتظرين منه شي بدون مقابل .
×  سواء كان أكبر منك أو أصغر هالكلام جداً حيفيدك معه .
×  حاولي في قعداتكم العائليه تمدحينه أوتثنين على شي سواه بشكل غير مباشر .



[ أفكار طرتلي ]


[[[[  الكلمه الحلوه ]]]]

×  أظن تعرفون الأغنيه إلي كلماتها :
 ( ماهي بالقوه . ماهي بالقسوه . بالكلمه الحلوه أنا أجي ويّا حنان وهوا )
×  ومتأكده إنكم تعرفون إن الكلمه الحلوه كانت سبب في دخول الكثير في الإسلام .
× يعني شوفوا قوة تأثيرها ! شوفوا  قد إيه ممكن تترك أثر في غيرك وكيف إنها تلين قلوب !.
(( الشاهد مما سبق والمطلوب منك إنك تكثرين من استعمالك لها ))
خاصّه قبل الطلبات << ( ومن له حيله  فـ ليحتال )

يعني قبل لا تطلبينه أي طلب مو تروحين له طوالي : فلان جيب لي كذا وكذا وأبغى كذا وودني هناك وضروري لازم اليوم وإلا ترا علمّت عليك أبوي .
<< طبعاً هذا إذا كنتي تبين تتسطرين، وينسحب عليك سيفون، وما عاد تشمين ريحة السوق .
هذا لا صار سواقكم كلميه بهالطريقه وهالإسلوب .
× أولاً روحي جهزي لك صينية حلا مثلاً أو حتى كوب كابتشينو وإلا إن شاء الله قطعة شوكلاته
لأن الرجّال عقله في بطنه  =)




(( توضيح ))
الرجّال عقله في بطنه << المقصود هنا ليس المعنى الحرفي / ليس المعنى إن الرجل كل تفكيره بطنه والأكل لا طبعاً
المعنى مخفي أو جاي على شكل لف ودوران =)
يعني إحنا البنات إذا كنّا مشغولات بشي مهم هذا هو أفضل وقت عشان أحد يطلبنا أي شي؛ لأنا دايركت حنوافق عشان نفتك من القروشه
المهم المقصود هو ( إن أفضل وقت عشان تطلبين الرجل حاجه هي لمّا يكون يأكل )
يعني كذا من الله هو يكون مروّق بهالوقت
وحتى لو نقرأ كتب في فن الإقناع راح نلاقي الشي نفسه، وفيكم تقرؤون أي كتاب في فن الإقناع وروحوا على باب إختيار الوقت المناسب وأكيد راح تلاقون هالشي =)
نرجع لمحور حديثنا >>

× وروحي ذوقيه وتفضل وعطني رايك ومن هالكلام وسولفي معاه شويه
× وبعدين قولي : لو سمحت ( فلان ) والله ناقصني كم شغله وياليت لو تنزلني السوق الفلاني وخلال ساعتين راح انتهي  ما راح أطول .
× لا تخلين لهجتك لهجة أمر بالعكس خليها لهجة طلب .
- هو : بس مالي خلق وبعد شوي بأطلع ومن هالكلام .
- إنتي : بلييييييز ( فلان بس دلعيه ) والله دقايق ما راح أتأخر .

× وإذا مره معنّد وما وافق خلاص لا تزعجينه لأن الذكور عامّةً ما يحبون الـ[ قرقر واجد ] أبداً .
يعني كثرة الكلام والحنّه هذي خليها لصديقتك أما العيال أبداً ما يحبون هالشي .
(( بس اطلبيه مره ثانيه في وقت ثاني وبنفس الطريقه ))  =)




[[[[ إهتماماته ]]]]

× شوفي شنهي إهتماماته ( عشان تقدرين تتقربين منه عن طريقها )
يعني إذا مثلاً هو يحب الكوره مرّه، شوفي وش أكثر فريق يشجعه وتابعي معه شوية مباريات .
× إذا عرفتي إن فيه مباراه لهالفريق قولي اليوم فيه مباراه الساعة كذا
× جهزي الفصفص، وتابعي معه، وتحمسي، ولا أوصيك بالتسليك يعني إذا جا فاول على فريقه قولي لا غش ما يصير والله هم الغلطانين .
× وإذا جاب فريقه قول سوي أنواع الإحتفالات والصراخ وإنقزي وإذا تعرفين تزغرطين زغرطي هع



[[[[ حسسيه بأهميته وفائدته ]]]]

× شوفي وش أكثر مادّه يحبها أو سهله عليه وخليه يساعدك في وحده من واجباتك إلي بـنفس هالماده، حتى لو انتي عارفه الحل .
× ويكون شي سهل مو معقّد << وهذا من باب إنك تحسسينه بأهميته وإنه سوا شي بحياته  =)
× وإذا كان مره ميح بالدراسه، اسأليه عن شي عندك بالجهاز أو يظبط لك حاجه فيه .



[[[[ الـهـدّيـة ]]]]

يا عالم الهدية موضوعها بسيط، وراس مالها 10 ريال .
× ما يمنع إنك إذا طلعتي سواء معه أو مع غيره ( أمك ، أبوك ، صديقتك ) إنك تجيبين له هديه ساعه - كبك - خاتم ( رجالي طبعاً ) .
× وممكن حتى أشياء بسيطه  ( وتترك أثر أكثر من الأشياء الغاليه ) << وجهة نظر .
يعني شريط بلاي ستيشين كوره وإلا قراند وإلا كراش – آيس كريم - حلاو – مشروب .
× يعني حاجات بسيطه بالنّسبه لك، بس صدقيني بتعني له الكثير
( يعني شوفي شعورك لو هو رجع من وحده من طلعاته وفجأه إلا هو جايب لك كاكاو مثلا، في كل الحالات راح تستانسين، اسم إنه تذكرك )
× وبتشوفين بعدها بمده بيجيب لك إلي أحسن .



[[[[ فـيـلـم ]]]]

× اشتريلك يوم من الأيام شريط DVD  مثلا فيلم رعب وإلا ان شاء الله جيبيه من صديقتك الزبده فيلم رعب
× بس أهم شي يكون مقطّـّع ( يعني مافيه أمور مالها داعي )
× وجهزي شيبس، وفشار، وعصير مثلا، وطفي الأنوار، وشغلي المكيف عالبارد؛ عشان الجوو يطلع بجد رعب
× و روحي لأخوك وقوليله عندي لك مفاجئه ووديه عالمكان إلي فيه العرض،
وقلويلي له مجهزتلك الفيلم الفلاني، وعلى أساس إنك كنتي راح تتابعينه بس خايفه،
<<  ويمكن عاد يتحمّس ويمسكها عليك  هع =)



[[[[ الـذّكـريـات ]]]]

× ذكرياتكم لمّا كنتوا صغار هذي أهم شي بالحياه
× سواء صور، أو فيديو، أو أحداث، بس ضروري تكون مضحكه مو حزن ونكد .
× المهم سولفي معه فيها وشوفوا إلي تتذكرونه سوا .



[[[[ للإقتراحات والشكاوي ]]]]

× إذا في أشياء تبين تقولينها له، وإلا مثلا طلب بسيط، وإلا حتى شي مضايقك منه ،
× إرسلي له عالإيميل، وإلا على رقمه .


[ كلمه ختاميه ]
× أخوك هو سندك هو ظهرك، حطّي هالكلام حلق بإذنك .
× وإلي يشتكون من أخوانهم إلي أكبر منهم، والله ياليت عندي أخو أكبر مني لو يضرب فيني ليل ونهار بس اسم إنه أخ أكبر مني، والله إنتي في نعمه ما بتحسين فيها إلا إذا فقدتيها .
× استمتعت كثير وأنا أكتب الموضوع ويارب إنكم تستفيدون منه =)


[ أخيراً وليس آخراً ]
× الموضوع مفتوح للنقاش .
× إلي عنده شي حاب يضيفه فـ ليضيقه .

/

×  
   
  
 
لآ أحلل النقل دون ذكر المصدر << ( غيداء )
لآ أحلل أبدا ً !.
والنقل يكون من ( القوس الموجود في الأعلى )  إلى  ( القوس في الأخير )


/

غـيـداء

...


أتمنى يوصل الموضوع لأكبر مجموعه ممكنه =)
وأرجو إن عند النقل، ينقل بالشروط السابقه 
وحيآآكم


...

87 التعليقات:

غير معرف يقول...

ماشالله كلآمك رووعه ونصآئح الكل راح يستفيد منها ,!

الله يعطيك العآفيه (F)

aziz7 يقول...

المراه بشكل عام غامضه والرجل هو من يكتشف هذا الغموض بمعنى ان الاخت صعب انها تسوي مثل ماقلتي لانها بنت والبنت تحب ان الشخص يسعى لها يعني مو معقوله اختي اللي تتقرب مني بينما هي غامضه بطبعها وتبحث عن من يكتشفها والرجل هو من يجب ان يكتشف الشيء هذا وهو من يجب عليه ان يتقرب وليس المراه
وكل هذه الامور امور غريزيه موجوده لدى كلا منا يعني ماتحصلين امراه ماهي غامضه او رجل مايحب اكتشاف الغموض لذلك ان كانت الاخ تلجاء لغير اخيها فهو السبب لانه لم يحاول ان يكتشف غموض اخته الفتاه تحتاج الى حنان وعطف وكلمه طيبه لا الى صراخ وقسوه تنفرها منك

من وجهة نظري الاخ هو من يجب ان يكسب اخته وليس العكس

الكلام يطول بالموضوع هذا لكني ما احب اثقل عليكم ......دمتم بود

غير معرف يقول...

عسااك ع ـالقوه

انا قريت الاغلب وليس الاشمل
لكن الواضح انو واااااااو ومتعوب عليه

لي رجعه يالغلا

ملاك في الكون

яâђℓ ќℓâş يقول...

قَد تَختَلف الأرآء هُنآ فِي مَسألة مَنْ يتقرب لِ مَنْ
لَكِنْ أتفِق مَعك فِي مسألة بِ أن الرجل بِه من الغرور مآيمنعه عَنْ بدء الخطوهـ
فِ إن كآنت فعلاُ الأُخت تَبحث عَن معنى الأخوهـ أن تبدأ هي هذهِ الخَطوه وتحآول كسبه
فَ الرجل كَ طِفل مَتى مآعآملته جَيداً متى مآكآن كآلحمل الوَديع
وَلكن هُنآ أنآ لآأبرئ ذِمة الرَجل .. فَ الرجل يجب عليه أن يَستوعب بِ أنْ هذهِ إُنثى
ويَجب عليه التَقليل مِن حِدته بل تجنبهآ تماماً لأن الفتآه بطبيعتهآ حسَآسه
الأفكَآر الَتي أدرجتيهَآ أكآدُ أجزِم بِ أنْ لو فَعلتهآ إحدىَ الفتيآت مع إخوتهآ حآدين الطِبآع
سيتغير وضعه تمَآماً وسيصبح أقرب قريب لهَآ
فَ ليس هُنآك أخ لآيخآفُ على إخته .. أو لآيريد لهَآ خَيراً

فَ حُسن المُعآمله هِي أسآس المَحبه السَآئدهـ

إستدَرجنِي المَوضوع يآأنيقه .. شكراً ..,

sara يقول...

انت رائعه و رائعه و رائعه ..
يالله .. حٌرمت من نعمة الأخ ..
لكنني استمتعت جدآ يالقراءة..وتعلمت من تلك الافكار ..
سأطبقهآ على جنس الذكور .. من أقاربي..

دمتي لنا غاليتي..:$
s

لحن يقول...

يعطيك العافيه اختي غيداء على هالموضوع الأجتماعي الي كلنا محتاجينه ونعاني منه كثيرا في مجتمعنا

رقي في الطرح
تسلسل الموضوع
وترابط الفقرات
جعلني ابتسم وانا اقرأ كلماتك الرائعه

بالنسبه لك اخي المتحث بغموض المرأة وحال الرجل

اقول صاحب الحظ الأكبر من هذا التغير هو المبادر سواء كانت فتاة ام رجل

والحمل على الأثنين ولو اني اتفق معك بأن الحمل الأكبر على الأخ لكن هذا لا يبرر لأخت عدم مبادرتها


غيداء .. دمتي مبدعه

غير معرف يقول...

مرا نايس البلوك مشششآء الله : )

غير معرف يقول...

حسيت انه علشان يرضى طال عمره لازم الاخت تفرش له الارض ورد !!
بصراحه الأخوه تكون نابعه من القلب وحسن العشرة والاحترام المتبادل والمحبة ..
انا كشخص المفروض اعرف واجبي تجاه أختي أو أخي أو والداي مانتظر المبادرة والتقرب من الآخر أو تقديم خدمة أو جميل أو أي كان علشان اقدم مقابلها خدمة حسيت الوضع صار بزنس ؟! قدم لي وأقدم لك =\ ..
صحيح تقصدين ان هذه وسيله للتقرب وكسر الحواجز ..
لكن برأيي أنه لازم التحرك يكون من داخل الشخص ..
ممكن تبادر الأخت صحيح ..لكن بالشكل المناسب اللي يحفظ مكانتها ولا اذا تعود الاخ على هذاالشيء ينتظر المبادرة من الاخت في كل شيء وممكن يرى في نفسه انه هو الرجل وعلى الاخت طاعته في كل كبيرة وصغيرة !!
انا برأيي الجلوس على مائدة واحدة من غداءوعشاء والقهوة اليومية وتبادل الاحاديث هذا مايقرب في سد الفجوة بين الاخوة ..

والاهم إستشارة الاخ أخته والعكس في مواضيعه الخاصه و الصراحه والبعد عن الانغلاق على النفس وكتم الاسرار !

كلامك جميل أختي اتفق معك وأخالفك في جزئيات ..
اتمنى تقبل مروري بصدر رحب =) ..

Thinkwisely

غير معرف يقول...

مآ ششآء الله عليج !

بجد موضوع ممتآآز .. وأكيد متابعة معاج للنهاية =)

ورآآح أطبق إلي قلتيه *.^ !

تسسلم إإيدج .. ويسسلم فكرج ~

استمري وحنا لج متابعين =)

بالتوفيق (f)

غير معرف يقول...

حشى والله لو انه رجلي kkkk ..
وليه اخضع لهالاشياء واسوي حفله وش استفيد من عطائي له غير انه هو بيستانس علي >.<

اصلا يصير مايسوي هالاشياء الا لانه يبي يثبت رجولته او لانه شكاك ويحسب كل الناس زيه .!!

والعيال اللي مثل كذا ماينفع معهم هالشي لانهم بيستغلوون ..


بس بررضوا ماقصرتي شدي حيلك المره الجايه واكتبي شلون يتاعملون اذكور مع اخواتهم ××

اسمع كثير بنات متأذين من هالشي..

صانكيو ..

خيتك لنوووه .,

طلال العتيبي يقول...

طرح مميز واختيار رائع للموضوع
تحليلك للامور منطقي
وطرق العلاج سهله
واهم شي من اللي ذكرتيه "الذكريات"
احس انها تقرب بينهم اكثر
~
ولله الحمد علاقتي بأخواتي ككل حلوه
لكن حسيت بكل شي بالموضوع
لأننا نطبقه بشكل دائم
..
تسلم يمناك
Talal AL-Otibi
taloosha

غير معرف يقول...

والله صادقة وشو والله لو انه رجلي

طيب الحين اتقرب وسوي واتنازل عشان عيونه اخووي بيرضى بطبعي وتصرفاتي اهلا وسهلا مااعجبه عنده جدران البيت يصك راسه فيهم

والله مابقى الا اذبح عمري عشانه عمره مارضى ولاتقربت منه دام هالشئ بسويه

انا موجودة يبي يسولف يضحك ينبسط يفضفض حاضرة لكن اني اشوفه مطنشني وطالع مع اخوياه 24 ساعة بسلامته هذي حياته وش دخلني فيه انا لي غيره اقدر اضحك معهم بعد وافضفض لهم

كلامك سليم بس فيه اشياء كثيرة تنفع للزوج مو للاخ

غير معرف يقول...

الكلام جدا رائع
والصراحه انا مجربته مع اخوي اللي اكبر واصغر مني
وصرت لهم مرايتهموماكنت اتوقع راح يكونون معايا كدا

اتمنى انكم تاخدو باكلام دا

اسأل مجرب

والله يهدي الجميع

خالد جبران يقول...

السلام عليكم

تناولت الموضوع من اكثر من جهة وهذا يعطيه زيادة بالروعة

احسن شي عجبني يوم تقولين الفراغ العاطفي صراحة جبتيها على الجرح
اشكرررك
واشكر اهتمامك والله يوفقك

غير معرف يقول...

من أبو فهد
............
والله الكلام حلو وشكلك دارسه الموضوع دراسه حلوه
وأعجبني تخطيطك كثير ومن جد أفكارك حلوه
وأشوف فيها فكر كبير
> يعني سبحان الله كأن اللي كاتبها شاب (لأختلاف فكر الشباب عن البنات>حسب نظرتي القاصره)

من جد أعجبني مجمل ماكتبتي
لاكن نقطه أن الرجال عقولهم في بطونهم
ليس صحيح 100% ففيه ناس مايهتمون
بسوالف الأكل وملي البطن ويهتمون لعقل المحاور
وفكره .....
مجملاً وفقك الله وعسا يحفظك بحفظه

غير معرف يقول...

روووعــه مهما وصفت فيه ما بخلص وكلللله وآقعي

حتى اسلوبك بالطرح مرررره مميز اهنيك 20 من 10

أخوكـ :DRND7

غير معرف يقول...

dali
_ _
كلآمك يجنن (f)

shOshO يقول...

موضوع مهم في وقتنآا الحالي ..
وأفكار جداً رائعه ..
وهالأشياء أحاول أطبّقها مع إخواني ..
من جد لاعطيتهم ألقاهم يعطوني ويبادلوني ..
..
ونقاط لو الطرفين يطبقونها على بعض كان شفنا أخوّة بحق ..
..
بس البنت مقصره تجاه أخوها وبالمقابل هو أيضاّ مقصّر ..
ولايعني إنه مايوجد إخوان قريبين من بعض جداً بس بصورة قليله ..
..
شوفي شنهي إهتماماته ( عشان تقدرين تتقربين منه عن طريقها )
^^ نقطه أتفق معك كثيراً ..
من جد أخوي الكبير يستانس لاجلست وسولفت معه عن المسلسلات والسيارات لوووول <ـ ـ مع إنّي ماأحب السيارات أحسها ماتهمني بس عشانه ..
وأخوي الصغير مبااااااااريات و بلايستيشن..
/
عآفاكـ الله على هالموضوع الراااائع من جميع المقاييس ..

F

غير معرف يقول...

كلآم رآئع بحق ..

غيدآء وآصلي الآبدآع ..

ولي عودةٌ مع جديدك ..

.. غنج (ميمي) ..
(F)

غير معرف يقول...

كلامك رووووعه ..

من ناحيتي اشوف اذا كل شخص فكر بمنطق ان اخوه او اخته مايتعوضون ماظنتي بيفكر ان يزعله او يثيره او حتى مايهتم فيه

فيه مره وحده كان عندها ثلاثه من اهلها محبوسين بالسجن

زوجها وولدها واخوها

وخيروها بينهم .. قالوا لها اختاري واحد منهم والاثنين الباقين نذبحهم

كان جوابها

زوجي اقدر اتزوج غيره

وولدي اقدر اجيب غيره

لكن اخوي ماعندي من يجيب لي غيره

واختارت اخوها

لان ماكو احد بالدنيا يعوض وجود اخ او حتى الاخت

مبدعه لابعد الحدود

ماشاء الله عليك

تقبلي طلتي

mro0omy
تحياتي ^_^

لمحه يقول...

نصايحك اعجبتني ,فيه نصايح كأنها لزوجي ماهي لأخوي :P
بس جد جد اعجبتني لبى قلبك والله ق1
اعتبريني متابعه :)

غير معرف يقول...

آلله آلله وٍش هآلكلَآم وقسسم ابددآع
تفكير ولا احلىآ
وان شاء الله راح اسوي بنصايحك
مع اني اسوي اشياء منهاا

آستمري يآلغلَآ
من متآإبعينك


صديقتك آلجديده .. بدور

badoory19

Unknown يقول...

جميـل .. بس أنا ما أحب أتقرب منه ~ هو اللي يحب يتقرب مني هههه

الله يهني كل اخو بأخته ;)

غير معرف يقول...

بطله يآ أنتي بطله ق1
بصرآحه أحس إنهآ تكون على حسب نوعية الأخو يعني فيه أخوه أبدآ مآ يحبون يحتكون بخوآتهم فـ يعني حتى مآ عندك فرصه تسوين شئ ><
بس أفكآرك مره رهيبه و حلوه و إن شاء الله بجربهآ مع خيو العزيز ق1

[ 7een ] يقول...

خليه يجي ويشوف كيف بتكون المعامله :(

اتذكر قبل العام كنت اتكلم مع صاحباتي عن هالموضوع
أقولهم اتمنى يكون عندي اخو أكبر مني

وكل وحده قامت تضحك علي يامجنونه احمدي ربك
على بالك راح يدلعك ، أو يجلس معاك طول الوقت

تهزيء يومياً ومشاكل ولاتروحين ولا تجين
ولاتلبسين كذا ولا تحطين .... الخ

كنت عارفه أنو (البعض) زي ماقالو بس مع ذلك أتمناه إلى ساعتك

وربي وربي صرت اقدم الاخ على اي شي بالدنيا

مره كان فيه استبيان لما كنت بالمتوسط
وأغلب الأسئلة كاتبه (أخي أخي أخي)

ولما اتذكر الحين اضحك على نفسي واضح اني كذابه

شوفي من الحماس ..

http://7een-b.blogspot.com/2010/02/free-hugs.html#comments

بس لاتضحكين


____

غيدآء .. الله يخليك لأخوانك ويخليهم لك

غير معرف يقول...

كلآمك روووعه .. آبدعتي .. غيدآء ..


وشي نحتآآآج له دآئمـآ ..

ويآإرب الكل يطبق = ) ..


علوي ق1

Ghado1406 يقول...

غيداء موضوعك جداً رائع ورآح يفيد كثير من البنات

بس ياليت الكل يطبقه ..

والله كثير بنات يفتقدون العاطفه ويدورونها بأشكآل خاطئه ,, فلو كل أخ أهتم بأخواته وبآدلهم السوالف وتقرب منهم وعوضهم شوي عن الحنآن اللي يفتقدونه ,, آضن بيكون حل لكثير من البنات ..

اتمنى الكل مايكتفي بالقرأه وبس ,, وإنما يبداء بالتطبيق =)

يعطيك العآفيه

غير معرف يقول...

يأإخطيـِـِـِـرٍ آنتـِـِـأإ
أإموٍ وٍ وٍ ت ع هَاِلَحِرَكِتتَات يآشيخـِـِه
..
يعتيـِـِـك آلعـِوِأإفي
ms._______D

غير معرف يقول...

موضوع حلو جدا ويعطيك الف عافية

ماشاء الله عليك تصلحين خبيرة سلوك وتربية لانك تعرفين حتى الأشياء الي يحبونها الذكور

فديتنا الأولاد مانحب نقرقر صحيح

------

ملاحظة اخيرة أنا استغرب نوعا ما في العادة الأخ أقرب للأخت من الأب يكون صديق مقرب في بيتنا كذا مادري عن بقية البيوت

غير معرف يقول...

يعطيك العافيه غيداء ..
كلام جداَ رآئع ومفيد
وإن شاء الله البنات يستفيدون منها
ويطبقون الكلام هذآ مع إخوانهم ..

غير معرف يقول...

مرررررررره كووووووول

غير معرف يقول...

ماا شاا الله برافوا عليك مبدعه ^_^

غير معرف يقول...

يآآ لبـآآ ق1 ~
آنآ آطبق كل آلكلآم آلي قلتيه مع آخوي آلكبير
بس عندي آخو مرآآ عصبي ويحقرني وآجد , بس سرت آتعآمل معآه بطريقه عكسيه ..
يعني آذآ قآل آنتي هبلآ آضحك وآقول آنآ هبلآآآ ض1
ويمشي آلموضوع تمآآم ..
وآلحمد لله علآقتي معآهم زي آلآصحآب وآكثر
ومرآ قريبيين من بعض خآصه لمن تزوجت آختي آلكبيره
سرت آحس آني آلمسؤوله عنهم ق1 ~
وآهتم فيهم ويهتمون فيني ق1 ~

~

ترآ رسلت صفحتك لصديقآتي عشآن يستفيدون ..!!
<~ سآمحيهـآآ

яeнaм

شكرآآ يآ عسسل

هيؤنهْ ~ يقول...

ماشاء الله عليكْ ~
فكره مررره رؤؤعه ..
ونتآئج مضمونه بإذن ربي ..
عافاك ربي
الله يجيب العواقب سليمه ..
متشكره يآ قدعهْ ~!

غير معرف يقول...

ماشاءالهل علييك
وبحآآول اطبقهاا مع اخووي مع انه والله ماايقصر بس انا مخربتها شووي

لااعدمنااك وعسى هاليد ماتمس الناار ياارب =)

غير معرف يقول...

Mashallah Great Blog :)

تقاسيم يقول...

موضوعكـ جهنمي وعجبني لذلك راح اقول اللي عندي من هالناحية

كلامكـ صحيح اختي وانا بنفسي اعيش هذي الحالة مع اخواني

لأن اخواني معاي سمن على عسل يعني اليوم متهاوشين بكرة حبايب ومافي بينا مشاكل جدية يعني كل

اللي بينا مشاكل تمر بين الاخوان بأي بيت ولكنها ماتفرقنا ابدا


طبعأأأأأأأأأأأ الاخوااااان تاج البنت وشرفها اول شيء وبعــدين صح فيه بعض الشباب مايعجبه العججججب
ياااارب احفظلي اخوووووااني وصلح شباب المسلمين





موضوعك فري فري نايس

يلا وش ورانا غير نجرب ونشوف

فديت خشتك

<<< يا حبها لك

خوية أخوهآآ يقول...

قسم بالله كنك تكتبين عني أنا وأخوي
أقرب خلق الله لي أخوي ربي لايحرمني منه إن بغيته أخ لقيته أخ وإن بغيته صديق لقيته صديق علاقتي فيه أغنتني عن ملاااااااااايين البنات يحس فيني لاصار فيني شي متضايقه مخنوقه اي شي مو زين يحسه من كثر قربه مني ما اطلع من بيتنا الا معاه طلعه هو مو فيها ما اطلع اقعد معه في البيت نلعب بلوت نلعب بلايستيشن نتفرج فلم اي شي المهم نتسلى ونضيع وقت مع بعض الين ننعس كل واحد دخل غرفته ونام
ربي يحفظه لي ويطول لي بعمره ولا يحرمني منه يارررررررررررررررررب
غيداء موضوعك روووووووعه يالغلا وياليت البنات يستفيدون منه وربي بيرتاحون كثير البنت مالهت غير اخوها مافي احد بيخاف عليك ويحميك كثره حافظوا على علاقتتكم باخوانكم وربي احساس روووعه وامان لاخر حد ق1
لا شٌلت يمناتس ياخيّه ق1

غير معرف يقول...

تسلم الايآآدي ..
امتعني الطرح ..
والاكثر جوهر الطرح ..
بس العنآآد عندنآ مشكلهـ .. ياليت تحطين موضوع عن كيف نتخلص منه<< احلفي ..

ويسلمووو ..غيداء

6aif

منصور يقول...

كلام سليم ووقائعي لكن نادراً مانجد هالمثاليه
انا لا أجد أي تقارب بيني وبين أخواتي ولا اجد مجال لكي أتقرب منهم في كثير من الأحيان تكون طلباتهم أن يجدوا تجاوب عندي راحـوا لغيري وأن ما فاد السائق
يعني يمكن عوامل التحضر من أسباب الأعتماد على النفس ومخليه فجوه بيني وبينهم وبعدين هالأمر ليس مشكله كبيره عندي لأني تعودت وصار شيء عادي
كلامك سليم لكن كيف الوصول له . <~ بالنسبه لي طبعاً

غير معرف يقول...

صباح الخير غيداء ..
كلامك وردك اكبر من عمرك بكثيررررر .. وهذا دليل على عمق تفكيرك ومدى ادراكك لعواقب الامور .. وبصراحه رايك والحلول اللى قدمتيها هى الحلول المثلى واللى المفروض الجميع يتبعها سواء الاخت مع اخوها او الاخ مع اخته ..
وعندى عتب وطلب بنفس الوقت ..
العتب انك يوم من الايام خذتى بخاطرك على وزعلتى من سؤالى وانا والله مااقصد الا كل خير ...
والطلب هو ان قلبك يكون وسيع ولاتحملين على احد .. واللى نقلت الموضوع هذا دليل على ضعف شخصيتها ودليل بنفس الوقت على تميز موضوعك وروعته ..
ادرى ان الكامل وجهه .. وتسلمين ياالغاليه غيداء .. أخوك الكبير .. حاااارث

ΗΛĐΣΣĿ يقول...

ما أجملها حروفْ
زخُرفت بَ الدرر

استمعت لَ وجودي هنا

ادامك الله يَ نقيه .. ق١

the . R . mix يقول...

جميل
ويستحق القراءة :)

تمنياتي لك بالتوفيق والتقدم

majed96 يقول...

موضوع جميل و مهم

فيه كثير من الواقعية التي صغتيها بشكل سلس و مرتب

ماذكرتيه من الممكن ان تقوم به الاخت .. وكذلك من الممكن ان تقوم به الزوجة

اعتقد ان تطبيق مثل هذا الامر يعتمد على العديد من العوامل

مثلا طبيعة علاقة الاخ باخته تختلف عن علاقته بزوجته .. وذلك نظرا لانه مع زوجته يتم التواجد بشكل شبه كلي بخلاف الاخت التي من الممكن ان تختلف مواعيد تواجدهم او خروجهم او غير ذلك


فارق السن كذلك يحكم تقاربهم احيانا فمثلا الاخ الذي يكبر اخته بـ 10 سنوات او 20 سنة تجديه في تعامله معها اقرب الى الوالد اكثر من الاخ وان كان اكثر مرونة وتفهم


عموما الاخ من المفترض ان يتسم بالرجولة والمسئولية ولا ينتظر مقابلا للقيام بمسئولياته تجاه اهله و خصوصا اخته ، يوصلها ، يخرجها ، يرفه عنها ، لايدعها تحتاج لاحد غيره ، وليكن هو اول صدر تلجا اليه ولا تشعر بالخوف منه

صدقيني الاخ عندما يمنع اخته من بعض التصرفات ، فهذا من باب الخوف عليها و تمني الاصلح لها وماسيقوم بفعله مع زوجته هو الذي سيرتضيه على اخته

موضوع جميل ..

دمت .. بفكر

غير معرف يقول...

كلامك جواهر والله

كله صحيح

اسمحي لي أبدي أإعجابي بكتابتك

ولو كل واحد طبق كلامك كان العالم بخير بس ما في أمل أإلا نسبة قليلة

رآقني حقآ

أإستمري على أإبداعاتك أإختي ||~

حااارث يقول...

ايه نسيت ... غيداء لايهمج احد ... وخلى اللى ينقل ينقل .. والاصلى اكيد غير التقليد !!!
اخوج ... حاااارث

غير معرف يقول...

اعجبني فكرك ربي يكملك بعقلك ماشاءالله عليتس
وياطول بالك على التنسيق والكتابه والامور الواجد
اهنييييك تناسق واسلوب راقي

مدهره

عبؤدْ ~ يقول...

تسلمين على الطرح الراااااائع يا غيداء ..
الله يعطيك الف عافيه...
ودي لك اختي ...

romantic^_^ يقول...

أسعدً اللهٌ مسآئكٍ يآغيدآءً..
أولاً :طريقةٌ سردكٍ جداً رآئعةً تٌنآسبٌ جميعُ الفئآتً العٌمريةً..
ثآنياً:بآالنسبةً لعلآقتيٍ مع أخوتيٍ جداً رآئعةً ولكنْ لآ أستطيع أنْ أطلقٌ عليهآ بالمثآليةً لكنهآ وللهٍ الحمد علآقةً جميلةً..
و حقيقةٌ أجدً انْ بإمكآنٍ الأنثىً عملُ الكثير وتحقيقٍ كلٌ مآتٌريدلكنْ لآبٌدً منْ لسآنٍ يٌجيدٌ الكلآمٍ المعسول والتهيئةً الجيدةً لكلٍ مآترغبً..
و لآ أركنٌ بالأخً وخصوصاً إنْ كآنً هوً الأكبرً فأتمنى أنْ تكونً لهُ القيآدةٌ المُثلى و الإستلطآفً و القلبً الحنونً..
ولآيجعلُ منء عٌمرهٍ وترتيبهٍ القآئدٌالمٌسيطرٌ بلٍ العكسٍ فليجعلً من قدومهٍ للبيتٍ جنةً لأُمهٍ و أخواتهٍ..
حقاً ذآكً الأخٌ والسندً الذيٍ تتمنآهُ كلٌ فتآةٍ لهً..
و أنْ يجعلً مسيرتهُ طآهرةً لأُسرتهٍ..
أختيٍ /غيدآء كلمآتٌ الشٌكرٍ تخفقٌ أمآمً بحرٍ فكركٍ الرآقيٍ..
سأكونٌ منْ مٌتصفحيٍ مٌدونتٌكٍ الرآئعةً..
أختكٍ/memo^_^

&

غير معرف يقول...

أشًـِيآآء حلووةً غيدآء

بس منْ يطبقهًـِآآآ !!!!!!!!!!!!!!

Ghaida يقول...

ماشالله كلآمك رووعه ونصآئح الكل راح يستفيد منها ,!
الله يعطيك العآفيه (F)
/
الله يعافيك ويسمع منك =)


عسااك ع ـالقوه
انا قريت الاغلب وليس الاشمل
لكن الواضح انو واااااااو ومتعوب علي
لي رجعه
ملاك في الكون
/
الله يقويك / وحياك بأي وقت =)


sara
انت رائعه و رائعه و رائعه ..
يالله .. حٌرمت من نعمة الأخ ..
لكنني استمتعت جدآ يالقراءة..وتعلمت من تلك الافكار ..
سأطبقهآ على جنس الذكور .. من أقاربي..
دمتي لنا غاليتي..:$
s
/
أهلا سارا / الأروع وجودك هنا / الله يعوضك إن شاء الله / بالتأكيد تنفع مع الذكور كلهم إن شاء الله =)


مرا نايس البلوك مشششآء الله : )
/
يعطيك العافيه هذا من ذوقك


مآ ششآء الله عليج !
بجد موضوع ممتآآز .. وأكيد متابعة معاج للنهاية =)
ورآآح أطبق إلي قلتيه *.^ !
تسسلم إإيدج .. ويسسلم فكرج ~
استمري وحنا لج متابعين =)
بالتوفيق (f)
/
يسلم قلبك / يعطيك ألف عافيه والله مجرد متابعتكم تشجيع لي / حيآآك بكل وقت =)

روووعــه مهما وصفت فيه ما بخلص وكلللله وآقعي
حتى اسلوبك بالطرح مرررره مميز اهنيك 20 من 10
أخوكـ :DRND7
/
يعطيك ألف عافيه / والله كلامكم شهاده أفتخر بها / حيآآك دائماً


dali
كلآمك يجنن (f)
/
أهلاً دالياً / تسلمين وحيآك دائماً


كلآم رآئع بحق ..
غيدآء وآصلي الآبدآع ..
ولي عودةٌ مع جديدك ..
.. غنج (ميمي) ..
(F)
/
منوره ميمي / يعطيك العافيه وحيآك بكل وقت =)

Ghaida يقول...

لمحه :
نصايحك اعجبتني ,فيه نصايح كأنها لزوجي ماهي لأخوي :P
بس جد جد اعجبتني لبى قلبك والله ق1
اعتبريني متابعه :)
/
تشرفني متابعتك لمحه / وترا عادي هي تنفع مع الذكور عامةً ولو زوجك زودي الدلع حبتين ويمشي الموضوع هع =)


المآرد :
جميـل .. بس أنا ما أحب أتقرب منه ~ هو اللي يحب يتقرب مني هههه
الله يهني كل اخو بأخته ;)
/
آآآآمين / حلوو بعد يعني مرتاحه هع =) / هو فيه النوعين بس الغالب على العرب النوع إلي ينتظر الوحده تبدأ الخطوه الأولى .


كلآمك روووعه .. آبدعتي .. غيدآء ..
وشي نحتآآآج له دآئمـآ ..
ويآإرب الكل يطبق = ) ..
علوي ق1
/
يعطيك ألف عافيه / آآمين / حيآآك أخوي بكل وقت =)


يأإخطيـِـِـِـرٍ آنتـِـِـأإ
أإموٍ وٍ وٍ ت ع هَاِلَحِرَكِتتَات يآشيخـِـِه
يعتيـِـِـك آلعـِوِأإفي
ms._______D
/
! لا تعليق !



موضوع حلو جدا ويعطيك الف عافية
ماشاء الله عليك تصلحين خبيرة سلوك وتربية لانك تعرفين حتى الأشياء الي يحبونها الذكور
فديتنا الأولاد مانحب نقرقر صحيح
------
ملاحظة اخيرة أنا استغرب نوعا ما في العادة الأخ أقرب للأخت من الأب يكون صديق مقرب في بيتنا كذا مادري عن بقية البيوت
/
الله يعافيك / (تصلحين خبيرة سلوك وتربية ) << حلوه الفكره =) / صحيح بس مو الكل كذا، وجميل جداً وجود هالشي ببيتكم الله يديمه آآآمين، إن شاء الله ويخليكم لبعضكم / حيآآك دائماً

Ghaida يقول...

يعطيك العافيه غيداء ..
كلام جداَ رآئع ومفيد
وإن شاء الله البنات يستفيدون منها
ويطبقون الكلام هذآ مع إخوانهم ..
/
تسلمـ/ـين والله يسمع منك ويطبقونه =)


مرررررررره كووووووول
/
تسلمـ/ـين =)


ماا شاا الله برافوا عليك مبدعه ^_^
/
يعطيك العافيه / وشكراً على هذا الإطراء =)


هيؤنهْ ~
ماشاء الله عليكْ ~
فكره مررره رؤؤعه ..
ونتآئج مضمونه بإذن ربي ..
عافاك ربي
الله يجيب العواقب سليمه ..
متشكره يآ قدعهْ ~!
/
( الله يجيب العواقب سليمه ) << هههههههههههههههه حسيت إني داخله حرب / ترا الموضوع عادي / عالعموم شرفتي هيؤنه =)


Mashallah Great Blog :)
/
يسلموو كلك ذوق =)


ماشاء الله علييك
وبحآآول اطبقهاا مع اخووي مع انه والله ماايقصر بس انا مخربتها شووي
لااعدمنااك وعسى هاليد ماتمس الناار ياارب =)
/
تسلمين يا قلبي على هيك دعوه =) / وإن شاء الله تظبط معك وتتعدلين معه هع ^^


تسلم الايآآدي ..
امتعني الطرح ..
والاكثر جوهر الطرح ..
بس العنآآد عندنآ مشكلهـ .. ياليت تحطين موضوع عن كيف نتخلص منه<< احلفي ..
ويسلمووو ..غيداء
6aif
/
الله يسلمك / بجد العناد هو المعضله هنا بس صدقيني إذا قدرت أتخلص منه بأعطيكم الطريقه =) / حيآآك

Ghaida يقول...

ΗΛĐΣΣĿ :
ما أجملها حروفْ
زخُرفت بَ الدرر
استمعت لَ وجودي هنا
ادامك الله يَ نقيه .. ق١
/
أسعدني ردّك / وتسلمين على هالإطراء الرائع كما روعة وجودك هنا / دمتي بود =)


the . R . mix :
جميل
ويستحق القراءة :)
تمنياتي لك بالتوفيق والتقدم
/
الأجمل هو مرورك / حيآك دائماً


كلامك جواهر والله
كله صحيح
اسمحي لي أبدي أإعجابي بكتابتك
ولو كل واحد طبق كلامك كان العالم بخير بس ما في أمل أإلا نسبة قليلة
رآقني حقآ
أإستمري على أإبداعاتك أإختي ||~
/
تسلم على هالإطراء / وإن شاء الله تستفيد أكبر مجموعه بإذن الله =)


اعجبني فكرك ربي يكملك بعقلك ماشاءالله عليتس
وياطول بالك على التنسيق والكتابه والامور الواجد
اهنييييك تناسق واسلوب راقي
مدهره
/
تسلمين / ههههههههههههههههههه معليش والله إستانست عالموضوع كنت أكتبه بحصص الفراغ بالمدرسه =)
واليوم إلي كنت أنسقه كان عندنا سهره بس يالله ماشي الحال =) / حيآك بأي وقت


عبؤدْ ~ :
تسلمين على الطرح الراااااائع يا غيداء ..
الله يعطيك الف عافيه...
ودي لك اختي ...
/
الله يسلمك على هالإطراء ومشكورين على تشجيعكم / حيآآك =)


أشًـِيآآء حلووةً غيدآء
بس منْ يطبقهًـِآآآ !!!!!!!!!!!!!!
/
هذا من ذوقك =) / وأكيد فينا الخير وإن شاء الله نطبقها سواء بنات أو شباب / حيآآك

غير معرف يقول...

b6alaaaaaaaaaaaaaaaa



mraaaaaaaaa rou3aaa :p

Ghaida يقول...

تسلمين يا عُمري
كلك ذوق
=) حيآك

Ghaida يقول...

أخ aziz7
/
أحترم وجهة نظرك وهذا يدل على وجود النوعين / بس الغالب من الرجال النوع إلي ينتظر أحد يبدأ الخطوه الأولى زي ماذكرت سابقاً بسبب الكبرياء عند الرجل وإن المرأة لينه في تعاملها / لكن لكل قاعده شواذ يعني في رجال عادي عنده يكون هو صاحب الخطوه الأولى وهذا شي حلو =)

/

هو صحيح وجود هالغريزه، بس المجتمع الخليجي بالذات الرجل يعتبر هالموضوع- إن هو إلي يتقرب من إخته - أصعب ما يكون !. إلا من رحم ربي !.
/

أحترم وجهة نظرك وأسعدني تواجدك =)
وحيآك دائماً

Ghaida يقول...

ra7l-5las

/

( فِ إن كآنت فعلاُ الأُخت تَبحث عَن معنى الأخوهـ أن تبدأ هي هذهِ الخَطوه وتحآول كسبه )
( وَلكن هُنآ أنآ لآ أبرئ ذِمة الرَجل .. فَ الرجل يجب عليه أن يَستوعب بِ أنْ هذهِ إُنثى ويَجب عليه التَقليل مِن حِدته بل تجنبهآ تماماً لأن الفتآه بطبيعتهآ حسَآسه (


صحيح 100% فالأمر لازم على الطرفين ولكن يبقى أمر من يبدأ بالخطوة الأولى مرهون بشخصية الأخ والأخت
والمفروض على الكل تقديم بعض التنازلات ليجني الأرباح فيما بعد =)


/


حيآك أخي وأسعدني مرورك وتعليقك =)

Ghaida يقول...

لحن

/

الله يعافيك / (جعلني ابتسم وانا اقرأ كلماتك الرائعه ) دوم إن شاء الله

(صاحب الحظ الأكبر من هذا التغير هو المبادر ) صحيحه 100% ويبقى الأمر مرهون على شخصية كلاً منهما

أسعدني تواجدك أخ أُسامه / دمت بود =)

تهـآني يقول...

جد جد كلمـآتك رهيبه ..
والله انك صـآدقه مااحد يعرف قيمة الشي الا بعد مايفقده :( ..
تصدقين اني احيان لما اقول للبنات ياليت عندي اخو اكبر مني يقولون لاااا مجنووونه انتي :| ..
حسيت انه شي رعب يعني :S ..
بس بعد كلامك ذا عرفت ان الغلط منهم :) ..

شـآكره لك ..
واسمحي لي النقل مع ذكر المصدر :) ..

Aouko يقول...

وعليكم السلام ورحمة الله وبركاته
بصراحة ما أعرف كيف أوصف الموضوع
قمممة في الرووعة
جدا مهم ورااائع بمعنى الكلمة
إلى درجة إني نقلته الى مدونتي ^^"

http://sakurasakurahime.blogspot.com/2010/03/blog-post_07.html

المهم أتمنى تقبليني وحدة من متابعاتك الجدد
وشكرا على كل شي
والسلام عليكم ورحمة الله وبركاته

Ghaida يقول...

sakura~hime :
تسلمين يا عُمري والله كلك ذوق
وأتشرف بمتابعتك لي
حيآك دائماً
=)

Ghaida يقول...

تهاني :
مسموحه / وتسلمين عالنشر
صدقيني لو وحده من صديقاتك بحثت شوي عن مفتاح قلب أخوها راح تغير نظرتها أبداً
حيآك تهاني بأي وقت =)


/


Thinkwisely :
بس يا كثرهم إلي يتغدون ويتعشون سوا ويسولفون سوا بس كل واحد باله بعييييد عن الثاني ولاهو يمّه .
بعدين أنا ما قصدت إن دائماً البنت مبادره لأن المطلوب هو الخطوه الأولى فقط والخطوه الأولى لها فروعها وبعدها راح يصير الموضوع متبادل =)
( والاهم إستشارة الاخ أخته والعكس في مواضيعه الخاصه و الصراحه والبعد عن الانغلاق على النفس وكتم الاسرار ! )
<< حلوه =)
/
حيآآك دائماً وبأي وقت


/


لنووه :
ما يحتاج يكون زوجك عشان تسوين هالأمور !
بعدين الغلط من الطرفين الغلط من الأخ لقسوته أحياناً والغلط من الأخت إنها أبد مو يمّه !
عالعموم منوره وحيآك دائماً


/


طلال العتيبي :
تسلم أخ طلال هذا من ذوقك
( ولله الحمد علاقتي بأخواتي ككل حلوه ( الحمد لله دووم إن شاء الله
الله يسلمك =)
/
حيآآك بأي وقت

Ghaida يقول...

يعني معقوله خلاص مستحيل تحبون في هالدنيا إلا زوجكم وأخوك طل !
أنا وجهة نظري تقول إن التعامل مع الرجال واحد / يعني إلي تعرف تتعامل مع أخوها هي إلي تقدر تتعامل مع زوجها !
ونفس الموضوع بالنسبه للرجال !.
وإلا على كلامكم هذا ما أظن على عهدكم بيكون في حالات طلاق !
إذا كانت كل وحده مخزنه جرعات الحنان لزوجها !
ننتظر ونشوف !.



/


تسلمين وهذا هو حال الدنيا / أخذ وعطا =)
لأن يد وحده ما تصفق / وإذا إتفقوا الأخوان هذا أكوس شي بالحياه =)
منوره



/



خالد جبران :
وعليكم السلام ورحمة الله وبركاته
تسلم أخ خالد هذا من ذوقك
والعفوو هذا أقل شي ممكن نقدمه


/


أبو فهد :
للمعلومية الكتابه والدراسه كانت سوا – لمدة 3 أيام ولكن الحمد لله أتت بنتيجه حلوه –
تسلم أخ أبو فهد هذا من ذوقك / ما أظن ! ألحين صار الفكر واحد
للمعلومية أيضاً تم توضيح المقصود من عبارة ( عقل الرجل في بطنه تحت النقطه تبعها بالظبط =)
وشكراً على تنبيهي =)
حياك الله دائماً منور ..



/



shOshO :
الأروع هو تواجدك هنا =)
(من جد لاعطيتهم ألقاهم يعطوني ويبادلوني .. ) << هذي من مجرب
وحلو تقربك من أخوك الكبير / الله يحفظه لك
الله يعافيك شوشو وحيآآك دائماً =)



/


Mro0omy :
الأروع هو مرورك =)
(اذا كل شخص فكر بمنطق ان اخوه او اخته مايتعوضون ماظنتي بيفكر ان يزعله او يثيره او حتى مايهتم فيه )
<< سليم 100% بس مشكلة تفكيرنا مقصور على الحاظر لا غير !!
تسلمين على مرورك مرّووم =)

Ghaida يقول...

بدور :
حيآك وأتشرف بصداقتك
عيونك الحلوه / إن شاء الله تشوفين النتائج بأسرع وقت =)
منوره badoory19


/


joori_sakurai :
تسلمين على هالكلام =)
بس التجربه مره وثنتين وثلاث تغير من طباع الشخص غصب ( كثر الدق، يفك اللحام )
إن شاء الله تنفع
وحيآك دائماً / منوره =)


/


7een :
(غيدآء .. الله يخليك لأخوانك ويخليهم لك )
<< آآآمين =)
لا أبد ما ضحكت بس تمنيت تتطبق عندنا هع بس طبعاً مع أهالينا
بجد مافي شي يعوض عن الأخ الأكبر وكل شي في سبيل وجوده يهون لو يطلب المستحيل =)
/
حييين حيآآك في كل حين =)


/


Ghado1406 :
الأروع هو مرورك =)
إن شاء الله / وهذي هي المعضله إن كل واحد يرمي اللوم على الثاني ويرفض إنه يكون صاحب الخطوه الأولى !
حبتك العافيه ونبي نشوف النتائج =)
حيآآك غدوو =)



/


Яeнaм :
لبى قلبك =)
الحمد لله وأكيد شايفه نتائج حلوه
(يعني آذآ قآل آنتي هبلآ آضحك وآقول آنآ هبلآآآ ض1 )
<< أحلى طريقه تتعاملين فيها مع الناس إلي يحبون المشاكل =)
مسموحين وبالعكس أنا أبي الموضوع ينتشر بأكبر قدر ممكن عشان يفيد الجميع =)
العفوو / منوره ريووم


/


تقاسيم :
الحمد للهوطبعاً أكيد مافي بيت يخلو من المشاكل
وأحسن مافيها – المشاكل - تغيير للروتين =)
بس أهم شي نعرف كيف نحلها بطريقه عقلانيه
(طبعأأأأأأأأأأأ الاخوااااان تاج البنت وشرفها )
وكذلك الأخوات =)
إن شاء الله تشوفون النتائج وتطلعوني عليها
أبي أحس إني سويت شي =)
/
حيآك تقاسيم بأي وقت / منور



/


خوية أخوها :
هههههههههههههههههههههههه
آآآمين الله لايحرمك إياه ويخليكم لبعض
حلوه علاقتكم وهذا الشي المطلوب
لأنه أغناك عن بقية الذكور عامةً إلي يوصلون بالطريق الغلط !
/
تسلمين على هالكلام كله من ذوقك
وحيآآك دائماً / منوره =)

Ghaida يقول...

majed96 :
( ماذكرتيه من الممكن ان تقوم به الاخت .. وكذلك من الممكن ان تقوم به الزوجة )
<< صحيح مع تغيير بعض الأمور
كلامك عن الأخت والزوجه صحيح 100% تحليلك رائع =)
وكل ما نحتاج إليه هو القليل من الشجاعه والتفكير لا أكثر
أسعدني تواجدك أخ ماجد / منور



/



Memo :
أسعد الله مسائك بكل خير =)
/
طبعاً لا يوجد علاقه مثاليه تخلو من الشوائب
ولكن عندماً نشعر بداخلنا بتحسن العلاقه سنتغاضى بعدها عن توافه الأمور
( بإمكآنٍ الأنثىً عملُ الكثير وتحقيقٍ كلٌ مآتٌريد لكنْ لآبٌدً منْ لسآنٍ يٌجيدٌ الكلآمٍ المعسول والتهيئةً الجيدةً لكلٍ مآترغبً.. )
كليوباترا أكبر دليل/ لعبت بعقول حكام يا كثرهم
( إن كيدهن عظيم ) . =)
أتشرف بتصفحك للمدونه
حيآآك دائماً وأبداً

Ghaida يقول...

حارث :
صباح النور =)
ولو أخ حارث في هالوقت مافي كبير وصغير بالعمر / كل شي يعتمد عالتفكير
بالطبع لازم الطرفين يجتهدون لتحقيق العلاقه المطلوبه كأخ وإخته =)
/
أما العتب / فأنا وضحّت لك أخ حارث مو مسألة أخذت بخاطري ولا شي بس بحكم عدم وجود قرابه بيني وبين أي شخص هنا فلازم أضع لنفسي حدود فما أقدر أسولف عادي كأني أسولف مع وحده من صديقاتي وإلا أنا ما زعلت =)
/
أما الطلب / فخلّصنا منها والحمد لله، وزي ما قلت الأصلى أكيد غير التقليد =)
/
حيآك أخ حارث أسعدني تواجدك

Ghaida يقول...

منصور :
( كثر الدق يفك اللحام )
<< يعني لو تحاول مره وثنتين وثلاث راح يظبط معك الموضوع
حاول إنك تسمع لكلامهم أكثر من مره
ولمّا تنفذ طلباتهم لا تسويه وكأنك مجبر بالعكس سولف معهم وزوّد على طلباتهم يعني لو بس طلبوا المجمع قبل لا ترجع البيت مر بهم عالمطعم ووضح لهم إن هالشي هديه وإلا شي زي كذا / وأهم شي خلال هذا كله تكونون تسولفون =)
ساعتها راح تعرف إهتماماتهم ومنها توصل لهم
/
المشكله مو بس في الحاله النفسيه يعني تعودنا وإلا لا المشكله في العواقب إلي ممكن تصير
المشكله في تبعات هالشي !
يعني ما تدري وش ممكن يصير بعد كذا !
المرأه بالذات المشاعر عندها بالدرجه الأولى !
/
حيآآك أخ منصور وجرب هالإلي قلت لك وإن شاء الله يظبط الموضوع =)
أتمنى إني أكون على علم بالمتغيرات، هالشي بيسعدني =)

غير معرف يقول...

غيداء كلامك جدا بطــــل لكن في شي ما اعجبني
اكيد اللي هو ان ( الرجل عقله في بطنه ) ومع انك شرحتيها تسليك لنا بس
P;
لكن برضو احس لما تنقال كأننا زي الرجال بالعصر الحجري الهمجيين البربريين الـ...
لكن أرجع اقول كلااااامك بطــــــــــــــــل (Y)

Ghaida يقول...

أولا يسلمو على هالإطراء وحيآك هنا ..
ثانياً : أسلّك !!
أعرفكم عشان أسلّك !


يا جماعه افهموا الموضوع / يمكن إنتوا ما تحسون بهالشي بس إحنا نعرف إن أفضل وقت عشان أطلب أخوي وإلا أبوي أي حاجه هو لمّا يكون ياكل لأنه يكون رايق جداً وهذا عن تجربه ..


وهذا بحد ذاته فن لو الكل يتقنه على كذا الكل بيهون أمره ..

لأن إختيار الوقت المناسب هذا من الشروط الأساسيه في فن الإقناع ..


وجرب تطلب من إختك شي وهي مشغوله وشوف كيف راح توافق
وبنفس الوقت إطلب أبوك شي وهو ياكل وشوف شلون راح يمشي حالك


/
جربوا قبل لا تحكمون ..
/


وحيآآك في أي وقت =)

غير معرف يقول...

عادي تنزرف؟
P;

غير معرف يقول...

ماشاء الله عليتس والله

من بعد ماقريت هالكلام ابي اقولتس وش رايتس تصيرين اختي : ) الله يحفظتس ويخليتس لأمتس وأبوتس واهلتس كُلهم

: ) بي هابي

ThrO_oy

Ghaida يقول...

أكيد عادي تنزرف بس يرجى الإلتزام بالشروط المذكوره أعلاه =)
والنسخ يكون من القوس إلى القوس


/

ThrO_oy
حيآآك وشكراً على هالدعوه ..
يكفي إنا أخوان بالإسلام =)
أسعدني تواجدك

unstoppable9 يقول...

م ـآلكش حـل يآ بت <<-- يعنــي خطيره :D

غير معرف يقول...

من جد ششكله عند الاأكل دايم يصيرون مروقين
ماتششوفون المسلسلات ولا الافلام لطلعوو لصار عندهم مششكله رآحو يتعششون <~ برآ
<~ لا احس من جدد شكلها ضابطه معهم ض1


شسسمه غييداء وربي موووضعوك ببطل
والحمد لله انا واخواني بحكم اني اكبرهم والبنت الوحيده مالي غيرهم
فـ مرررره آتقرب منهم <~ الوحده وما تفعل خخخ
بدليل انه امس قبل ماأنام دخل على اخوي وقال بسولف شوي فضفض لي وطلع ض1

واهم ششئ عند العيال لقالك شئ انتبهي تقولينه لاأحد
بعدين يندم إنه قالك =)


الله يخلي لنا أخواناااا


ابدعتي ومرره حبيت صفحتك ق1

T5ayl999 < تعرفيني من هناا ض1

Ghaida يقول...

تسلم أخ unstoppable9
أسعدني تواجدك وحيآك دائماً =)


/


T5ayl999
أكيد وبلا شك وهالمعلومه عن مجرب =)
تسلمين كلك ذوق
((واهم ششئ عند العيال لقالك شئ انتبهي تقولينه لاأحد
بعدين يندم إنه قالك =) ))
<< كلامك صحيح 100%
آآآمين
حيآك دائماً منوره

انثى في قلب رجل يقول...

أختي غيدا/

أعجبني طرحك جداً .. فعلا كلامك صحيح .. مو مع الاخ بس
حتى مع الاب .. والام .. والزوج ...~

.
.
لله درك يالغالية
والله لا يحرمني من طرحك الاكثر من رائع ..~

غير معرف يقول...

الموضوع يحتاج مني اكثر من مجلد للتعليق عليه ولي عوده ان شاء الله


ولاكن سؤالي هو


سبق وان قراءة موضوعك في مكان اخر وعلى ما اعتقد في منتدى في اي منتدى تكتبينن

Ghaida يقول...

شكراً أخت ( أنثى في قلب رجل )
الموضوع ينفع مع الجميع بشوية تغييرات بسيطه
بس التغير الجذري يبدأ منّا
حيآك الله وأسعدني تواجدك =)


/

بخصوص السؤال
ما أكتب في منتديات
بس عندك الأخت sakura~hime نقلته للمدونه تبعها
والإخت تهاني نقلته للمنتدى تبعها ( تنسيم )
وإنسرق من أحد الأشخاص في منتديات أحباب بس تم التراسل مع الإداره وتم حذفه !!

بإنتظار عودتك =)

غير معرف يقول...

يخسى أخوي أسويله كذآ ..
صرت خدآمه موب أخته كذآ !

عموما كثير بيستفيدون من الكلآم ..
وتقريبآ كل المشآهدبن إلا أنآ ..
مقدر أطبق أشيآء هيك :S

عوآفي (f)

سكر الجماز يقول...

ماشالله الصراحه كلآمك مرره حلو ويدخـل العقل .. وخلي الوحده او الوآحد يفكر فيه ويسويه بالحرف الوآحد /"" انا شخصيآ اقنعني كلآمك وحبييته كثير وحسيت لو بسويه لأخوآني رآح يتجآوبون معآي وخآصه ان عندي اخواني من ابوي ومن امي وابوي كبار واصغر مني , بس عندي اخوي اللي بأول بثآلث متوسط مرره عصبي ومزآجه صعب عكس اخوي اللي اصغر مني بسنتين.. اللي بالمتوسط عصبي . فيه عزة نفسه جدآ وآضحه ومو كل شي يحبه ويدخل مزاجه واكثر شي اتضايق منه بيني وبينه انو اي شي اسويه او حتى ابي اطلع مايجي يقولي وين بتروحين لا ؟ يروح يسأل أختي الثانيه اللي اكبر .. وحتى مو دايم يسولف معاي يعني ماادري كيف اتعامل معآه صعب جدا وربي يعين انشالله :) شكرا كثير ع الموضوع اللي كتبتيه روعه واكثر من روعه . لآعدمنــآك والله [ واذا ماعندك اخوان انشالله ربي يرزقكم

غير معرف يقول...

تعليقاً على من قال بأن الرجل يكتشف غموض المرأة..
فهو -بكلّ أسف- مُخطئ..
المرأة أحياناً تعجزُ عن فِهم نفسها!
فكيف يفسّر غموضها الرّجل؟
أظنّ المرأة الغامضة.. صعبةُ الفِهم حقّاً..
مهما بلغنا من ذكاء.. وفِطنة..
فلن نتوصّل لهيكل شخصيّتها الحقيقيّة !
دمتُم !

Ghaida يقول...

يخسى أخوي أسويله كذآ ..
صرت خدآمه موب أخته كذآ !

<< لا مشكلة !
إنها حرية شخصية !
ولكن لا تنتظري منه الكثير ..



/



سكر الجماز :
ربي يسهل عليكِ ويوفقك مع أخوك وتعرفين له ..
شوفي ..
كل رجل وله مفتاح !.
بس يحتاج منا الموضوع إجتهاد أكثر حتى نلاقي هالمفتاح !.
وعادة نعرف مكانه لما نتقرب من هالرجل ونعرف عن شخصيته أكثر ..

أنا لي أخ الحمد لله وربي يحفظه لي آآآمين ..
بس لي بعد أخ متوفي وهو إلي أكبر مني ..
وشكراً لدعائك ومافي مانع يجيني أخ زياده=)




/




المرأة أحياناً تعجزُ عن فِهم نفسها!
<< كلام سليم جداً
والكل يستطيع التقرب من الكل والمبادر هو صاحب الحظ الأوفر =)

شكراً لمرورك ..~

غير معرف يقول...

مااااشااءالله عليييك
اصفقلك وتصفييييق حااار كمااان
يعطيييك العافييه غيداء عالكلام الرائع الي يحمس
والله ياقلبي كلنا ودنا بهالاشياااء
بس ماتعودنا من البدايه
وتعرفين الاولاد يمسكونهاا علييك وبقووه بعد
انا مو ميااانه مره ولا مقاطعته مره يعني اوك الحمدلله
.
.
تسلم اناااملك الي خطت الموووضوع الرائع
ومتااابعه جديده لجديييك
تحياتي

Ghaida يقول...

بالتأكيد سنواجه بعض الصعوبات وربما التعليقات وربما الرفض أيضاً ..
لكن ذلك حتماً لن يقف عائقاً أمامنا، فمن الطبيعي تواجد هذه العناصر في كيمياء البداية ..

وفي مختبر الحياة سنندم أكثر إن لم نخض التجربة وإن أحدثنا إنفجاراً ..

فلو كان الجميع يخشى خوض التجارب مجهولة النتائج لما كان هناك من يسمى بـ مخترع ، أو مكتشف ، أو مغامر أو أو أو ...

وفي كل الحالات لن نكون الخاسرين إن أقدمنا على هكذا شيءوإن قوبلنا بالرفض، فالخاسر هو الطرف الآخر بالتأكيد فقد أضاع على نفسه الكثير ..


أشكر تواجدك وثنائك ومتابعتك أيضاً ..
دمتي ..

غير معرف يقول...

ماشاء الله عليك
مبدعة × مبدعة

اذا ممكن رااح ارسل رابط الموضوع للناس الي اعرفهم
×_×

Ghaida يقول...

أكيد ممكن ويسعدني هالشي
حيآك الله =)

إرسال تعليق